Biss ftit jiem ilu, Il-Kummissjoni Ewropea ppubblikat tliet dokumenti bħala risposta għar-rapporti li ħejja l-Gvern Malti tul ix-xahar ta’ Ottubru. Dawn huma l-Commission’s Assessment of the Economic Partnership Programme, l-Assessment of the Report for Real Effective Action u l-Assessment of the Draft Budget 2014, kif ippreżentati lill-Gvern mill-Kummissjoni. Ir-rapporti min-naħa tal-Gvern saru f’Ottubru qabel il-preżentazzjoni tal-Baġit 2014 fil-Parlament.
Billi Malta qiegħda fil-proċedura ta’ defiċit eċċessiv, il-Gvern kellu jirrapporta fl-1 ta’ Ottubru dwar x’riformi kien qiegħed jippjana biex jindirizza l-qafas fiskali tal-Gvern, sew fil-preżent u anke l-futur, u b’mod immedjat x’azzjoni effettiva ħa biex din is-sena l-finanzi jispiċċaw b’defiċit taħt it-3%. L-Unjoni Ewropea qed tgħidilna li qrat u fliet dawn ir-rapporti, kif ukoll rapport ieħor li tajniha dwar il-pjan tal-Baġit qabel dan ġie rappreżentat fil-Parlament f’nofs Ottubru.
Nista’ ngħid li huwa ta’ sodisfazzjon kbir għalina, u għalija personali, li l-Kummissjoni Ewropea hi kuntenta bil-mod li bih aħna qegħdin nindirizzaw dawn il-problemi. Fir-reazzjoni tagħha għall-Economic Partnership Programme tal-Gvern Malti, il-Kummissjoni tinnota li Malta ħadet azzjoni effettiva biex tindirizza l-iżbilanċ tal-Baġit u l-ebda passi oħra fil-proċedura ta’ defiċit eċċessiv mhuma meħtieġa għall-preżent. Dan ifisser li Malta rnexxielha, għal darb’oħra, tevita miżuri korrettivi imposti mill-UE li jistgħu jkunu ta’ dannu għall-ekonomija Maltija.
Ta’ min jinnota wkoll li l-Kummissjoni rrimarkat li l-miżuri proposti tal-Gvern fir-rigward finanzi pubbliċi huma “ġeneralment adegwati u jistgħu jkunu mistennijin li jikkontribwixxu għat-tisħiħ tal-finanzi pubbliċi”. Pożittivi kienu wkoll ir-rimarki tal-Kummissjoni li r-reviżjoni li għaddejja fuq l-infiq (Spending Review) se “tippermetti lill-Gvern inaqqas u jikkontrolla n-nefqa filwaqt li jagħmel progress fir-rigward ta’ infiq pubbliku aktar favur it-tkabbir.”
Sintendi, r-riskji jibqgħu u fil-fatt il-Kummissjoni qiegħda tgħidilna li hemm xi oqsma fejn għandna noqogħdu attenti, u għamlet numru ta’ rakkomandazzjonijiet dwar x’hemm bżonn isir aktar. Il-Gvern qed jieħu dawn ir-rakkomandazzjonijiet bis-serjetà kbira u se jkun qed iħares lejn numru ta’ soluzzjoni f’dan ir-rigward, sew fuq in-nefqa u sew fuq l-ispiża tiegħu.
Iżda punt importanti li sa fl-aħħar ħareġ mill-osservazzjonijiet tal-Kummissjoni Ewropea hi l-ispjegazzjoni għalfejn il-Kummissjoni qiegħda tbassar defiċit għas-sena 2013 ogħla minn dak li qed jipprojjetta l-Gvern.
Dan huwa dovut għal kif, grazzi għall-projettazzjoni tad-dħul ottimisti mill-amministrazzjonijiet preċedenti, il-Kummissjoni hija xettika li projettazzjoni ta’ dħul indiretti ta’ Malta se jimmaterjalizzaw, u għalhekk adottat valur previst aktar kawt, bir-riżultati li qegħdin ibassru defiċit ogħla.
Fil-fatt, il-Kummissjoni qed tiddefendi speċifikament il-pessimiżmu tagħha fir-rig- ward ir-riskji futuri għat-trażżin tan-nefqa tal-Gvern Malti abbażi ta’, fi kliemha, “l-esperjenza tas-snin preċedenti” tagħha u li dawn kienu “seħħew b’mod frekwenti fil-passat”.
Iżda minkejja dan, għal din is-sena huwa ċar li l-Kummissjoni kkonkludiet li l-azzjoni li ħadna hija sodisfaċenti u, allura mhux se tieħu l-ebda passi oħra għal din is-sena. Din hija xi ħaġa li tagħmlilna kuraġġ. Ir-riskji li jissemmew irridu noqogħdu attenti għalihom.
Iżda, dawn ikomplu jżidu d-determinazzjoni tal-Gvern li jasal. Dan speċjalment meta nafu li hemm affarijiet li jridu jitħabbru u li aktar se jkomplu jikkonvinċu lil kulħadd li l-pajjiż qed jagħmel mill-aħjar biex iżid it-tkabbir ekonomiku iżda aktar importanti li dan isir f’qafas b’mod li ma jkollniex għalfejn inżidu d-dejn u lanqas id-defiċit tal-pajjiż.
Jiena ninsab konfidenti li ladarba l-Kummissjoni tevalwa d-dokumentazzjoni sħiħa tal-Baġit 2014 bid-diversi miżuri tagħha favur it-tkabbir ekonomiku dawn se jkunu jistgħu jikkonfermaw li l-Baġit li ppreżentajna jilħaq l-aspettattivi kollha biex jintlaħqu l-għanijiet ekonomiċi u finanzjarji tal-pajjiż.
– It-Tnejn, 25 ta’ Novembru, 2013